A.P. Møller verkætlanin er Heimi í Húsi er komin væl áleiðis. Sethúsini Niðri í Húsi eru um at vera liðug og næsta byggistig í verkætlanini eru sethúsini Uppi í Búð.

Alt er tikið innan úr húsunum og sunnari endin er tikin burtur. Men áðrenn farið verður víðari skal Føroya Fornminnissavn gera forfrøðiligar forkanningar. Tað eru serfrøðingar settir av Fornminnissavninum sum gera arbeiðið undir leiðslu av Símin Arge fornfrøðingi.

Á myndini omanfyri sæst Ann Sølvia Jacobsen grava. Bønhúsið sæst í baksýni.

Áhugavert sær tað út tá moldin er grivin burtur og ymsu grótstrukturirnir liggja sjónligir. Tankarnir sveima aftur í forntíðina til tey sum einaferð búleikaðust í oynni eftir heilt øðrum fortreytum heldur enn vit gera í dag.

Her eru tað teir báir Mads Hoydal og Magnus Samuelsen sum hugagóðir gera sítt arbeiði.